Помню – йшла я да ратушы хутка Паглядзець, як гараць ведзьмакі, Толькі чую – гукае Марутка: «Бач, Агата, красунчык які!» Ў задуменьні, маруднай хадою, Увабраны ў шалом залаты, Ехаў ён на кані саматою, A прыгожы, – як Юры сьвяты. Шмат адгэтуль мінулася часу... Ах, калі бы ізноў павідаць I каня, i убранства пакрасу, I знаёмую сэрцу пастаць! Я сяджу дзень за днём у аконца Ды праду апрыкрылы кужэль, I гудзіць, ўсё гудзіць верацёнца. Як у полі далёкім мяцель. Ах, чаму я, на што змарнавала Так свае маладыя гады, – Ах, чаму я, на што не спытала, Хто ён гэткі, i едзе куды! Толькі б зьведаць – i з воску фігуру Я найменьнем яго ахрышчу, Выйду ноччу на поле у буру I закляцьце сваё нашапчу. I празь сьвіст, праз гудзеньне вятрыска, Цераз шум прыдарожных ракіт Я пачую так блізка, так блізка Гук знаёмы ад конскіх капыт. He забыць мне, што спасенне трачу, Што душу варажбою гублю, Але знаю – яго я пабачу I нарэшце скажу, як люблю.
[1915–1916]
|
|